(原标题:去睇通草画)
白话广州
仲有个零月就过年。出年嘅鸡年,广州继续请外地朋友来呢度过个有粤味嘅新年。过年有咩好节目?除咗行街拜年饮饮食食之外,负责接待嘅“花城人家”不妨带佢哋去逛下十三行博物馆。有咩好睇?去睇最出名嘅广州“通草画”啰。
好多人都唔知,通草画系真正嘅广州“特产”。佢起源于清末,由于当时多数用来出口,所以民间保存落来嘅比较少。亦都可能因为呢个原因,提起“通草画”,好多后生仔都蒙查查。之前有个老师做过调查,发现大家对呢张广州“明信片”知之甚少,好多上咗年纪嘅人都仅限于“听讲过”。可能广州师奶听“通草”多过“通草画”——哈哈,呢种植物对哺乳妈妈好有用。
点解话通草画系广州嘅“明信片”呢?因为喺未有相机嘅年代,呢啲色彩鲜艳嘅画反映咗当时广州嘅民情风物,尤其系升斗市民嘅生活,卖莲藕、卖油、卖烟斗、卖菜卖肉、卖花……市井百态都可以入画,好受西方人欢迎。最鼎盛嘅时候,十三行附近有几十家商铺卖通草水彩画。
好在,依家好多小学同课外辅导班都有关于通草画嘅课程,通草画未至于没落。话唔埋第日,佢又成为最特别嘅“广州手信”呢。所以话,带外地朋友去睇通草画,顺带自己都去了解一下,咁就肯定唔会“失分”啦。
李月婷 媒体人
(原标题:去睇通草画)